Kauli ya Nape yamkuna Mwakalebela

Na Mwandishi wetu, Iringa

ALIYEKUWA mshindi wa kura za maoni ndani ya chama cha mapinduzi (CCM) katika kinyang'anyiro cha kumsaka mgombea ubunge wa CCM Jimbo la Iringa mjini mwaka 2010 Frederick Mwakalebela ameeleza kufurahishwa na kauli ya Katibu wa Itikadi na Uenezi wa CCM Taifa, Nape Nnauye, kuhusu siri ya ushindi wa mbunge wa jimbo hilo, Mchungaji Peter Msigwa (CHADEMA).

Hivi karibuni, Nape akiwahutubia wananchi wa Iringa, alieleza kuwa, makosa waliyoyafanya ya kumuengua Mwakalebela ndiyo yaliyosababisha wananchi wakasirike na kukiadhibu chama hicho kwa kumchagua mchungaji huyo.

Akizungumza jijini Dar es Salaam juzi, Mwakalebela alisema, kauli hiyo ya Nape itasaidia kupunguza hasira za vijana kukihama chama hicho na kuhamia vyama vya upinzani, hivyo kuwataka watulie kwani kuna mikakati kabambe anayoifanya kwa ajili ya kuwawezesha vijana hao ili kuwa wajasiriamali badala ya kushinda vijiweni.

Alisema kuwa uwazi na ukweli wa Nape kuhusu makosa yaliyojitokeza katika jimbo hilo la Iringa mjini ni moja kati ya mambo ambayo wananchi wa Jimbo la Iringa Mjini walitegemea kuelezwa na kiongozi huyo .

Hivyo alisema kuwa mbali ya kuwa bado hajaamua kugombea ama kutogombea katika jimbo hilo ila bado ataendelea kuwa kada mzuri wa CCM na wala hatajaribu kukihama chama chake CCM kama ambavyo baadhi ya makada wenzake wanavyofanya.

Chanzo: Tanzania Daima